إختيار اللبس مهمة ممكن تشوفها سهلة، مجرد إنك تتابع الموضة و تشتري علي أساسها، لكن الموضوع مش كده خالص، لأن الإختيار الخاطئ بيدي نتيجة عكسية تماما، و بيظهر كمان عيوب الجسم. و من كل الموضة إنت محتاج تلبس المناسب ليك بس، و لو عندك مشكلة إنك تحدد شكل جسمك و عاوز رأي صادق ممكن تستعين بصديق أو حد عيلتك، و هنحاول في المقالة ده نساعدك إزاي ببساطة تحدد اللبس اللي يليق علي شكل جسمك.

جسم شكل مثلث
الجسم اللي بياخد شكل المثلث هيكون فيه منطقة الوسط و الفخدين أعرض من الكتفين، و التحدي هنا هو إختيار اللبس اللي يعمل توازن بين الجزء العلوي و السفلي، في الحالة ده ممكن تلبس إيه؟ أكتر حاجة ممكن تناسبك الخطوط الطولية اللي بتدي إحساس بالنحافة، الجواكت الواسعة نسبيا عند الكتف، و البدل اللي بصف زراير واحد. و النصيحة المهمة إنك تبعد عن القمصان الضيقة، الرقبة الدائرية، الخطوط العرضية، الأحزمة العريضة، البنطلونات السكيني، و الألوان الزاهية و المنقوشة.

جسم شكل مثلث مقلوب
الجسم في الحالة ده بياخد شكل مثلث مقلوب، و يكون فيه منطقة الصدر و الكتفين أعرض من الوسط و الفخدين، و ده بيكون أكتر في الرياضيين.
لو إنت من النوع ده ممكن تلبس إزاي؟، حاول تختار القمصان اللي علي قد جسمك بالظبط، التيشرتات اللي ياقتها بتاخد شكل سبعة، البنطلونات المناسبة لمقاسك مع جاكت و حزام.
و حاول تتجنب البنطلونات السكيني، اللبس اللي ليه أكتاف مبطنة، و أي نقوشات حوالين الرقبة، لأن كل الحاجات ده بتزود الإحساس بضخامة الجزء العلوي عن الجزء السفلي.

جسم شكل مستطيل
الجسم اللي علي شكل مستطيل بيكون فيه تقريبا الكتفين و الفخدين نفس المقاس، السؤال دلوقتي لو كان جسمك بياخد الشكل ده ممكن تلبس إيه علشان يكون مناسب ليك ؟.
أكتر حاجات ممكن تحل مشكلة الجسم المستطيل هي لبس طبقات فوق بعض، الكوفيات، الخطوط العرضية، الرقبة الدائرية، و الألوان الزاهية، كل ده هيزود الإحساس بضخامة الجزء العلوي نسبيا عن الجزء السفلي من الجسم. و أهم نصيحة إنك تبعد عن الجواكت اللي ليها صفين زراير.

الجسم البيضاوي
لو كنت من الناس اللي الوسط عندهم أعرض من الكتفين و الفخدين، يبقي إنت من أصحاب الجسم البيضاوي، في الحالة ده ممكن تلبس بنطلونات واسعة، حمالات ، قمصان بفتحة واسعة، خطوط طولية، جواكت بصف زراير واحد.
و الجسم من النوع ده مينفعش معاه الحزام الضيق عند الوسط، اللبس اللي مليان نقوشات زحمة و مزعجة للعين.

جسم شكل شبه المنحرف
و أخيرا لو كنت صاحب جسم علي شكل شبه منحرف، و اللي بيكون فيه الجسم عريض عند الكتفين، و يقل العرض بالتدريج لحد ما يوصل للوسط، و ينزل بنفس التناسق لحد الفخدين، يبقي أكيد إنت
إنسان محظوظ، لأن عندك إختيارات كتير في اللبس، بداية من اللبس اللي علي قد جسمك لحد الملابس الرياضية اللي هيكون شكلك فيها رائع.