أخيرا، بعد سنة طويلة بدأت الأجازة الصيفية، و المصيف أصبح محور حديث الجميع، نروح فين؟ و إزاي نخطط للأجازة صح؟ علشان نستمتع بكل لحظة و نرجع لروتين الحياة اليومي بمخزون من الذكريات الحلوة. و أول خطوة في التخطيط هو التفكيرفي محتويات شنطة المصيف، و إزاي نحط فيها كل اللي هنحتاجه من غير ما نشيل حاجات زيادة، أو ننسي حاجة مهمة. تابعنا في المقالة ده و هنحاول نساعدك ترتب شنطة المصيف بكل سهولة.

لبس المصيف

إنت محتاج تحقق حاجتين مهمين في اللبس اللي هتاخده معاك، أولا يكون مش كتير علشان الشنطة تكون سهلة في الحركة، ثانيا يكون عندك إختيارات متعددة و تكون في قمة الشياكة علي البحر أو لما تخرج. هنحاول نساعدك في المعادلة الصعبة ده، و نقولك إيه اللبس اللي ممكن تحطه في شنطة المصيف لو الأجازة أسبوع واحد .

طبعا علشان السباحة أهم نشاط في المصيف يبقي أهم قطعة هي المايوه، 2 شورت بحرألوان زاهية و مبهجة ، 4 تيشرت قطن تناسب الجو الحر و طبعا سادة علشان تناسب ألوان الشورت (بالطريقة ده لو لبست كل يومشورت مع تيشرت مختلف هيبقي عندك أطقم كتير تقدر كل يوم تظهر بلوك مختلف علي البحر)، طاقية أو كاب للشمس، شبشب أو صندل خفيف للمشي علي الشط، فوطة بحر، 7 أطقم داخلية، 3 بيجامة بيت، شبشب بيت.

الخروج بليل في المصيف متعة و خاصة مع الأصحاب، و ده هيحتاج منك ترتيب لبس يناسب خروجات السهرة. بنرشحلك قطع اللبس ده تكون من محتويات شنطة المصيف: شورت جينز و طبعا ده بيتصدرموضة 2018 لأنه سهل و شيك و مناسب مع القمصان و التيشرتات كلها، شورت جبردين، بنطلون جينز أو رياضي حسب رغبتك، 4 تيشرتات (في 2018 هتلاقي تشيكلة رائعة من التيشرتاتالسادة و اللي عليها لوجو بسيط و كمان الملونة بألوان حيوية و شبابية)، حذاء رياضي هتكمل بيه اللوك الكاجوال الرائع.

و بالتأكيد يفضل تكون جميع قطع الملابس نظيفة و مكوية للسهولة و عدم تضييع أي لحظة في المصيف.

أدوات شخصية

و من محتويات شنطة المصيف الأدوات الشخصية اللي لازم نرتبها كويس جوه شنطة صغيرة زي مشط أو فرشة شعر، فرشة أسنان، معجون أسنان، شامبو، بلسم، صن بلوك، كريم شعر، نظارة شمس، ماكينة حلاقة، كريم حلاقة، قصافة.

الأفضل يكون معاك شنطة يد صغيرة تحتفظ فيها بمجموعة حاجات ممكن تضيع منك في أثناء السفر منها:رخصة العربية، رخصة القيادة، المحفظة، مناديل جيب، شاحن الموبيل، و باور بانك.

يلا بسرعة حضر محتويات شنطة المصيف، و رصها بطريقة منظمة ؛ و بكده هتوفر وقت ممكن تقضيه و إنت بتدور علي حاجة معينة، و كمان هتوفر فلوس لو نسيت حاجة مهمة و محتاج تشتريها؛ أيام و ليالي المصيف بتمر بسرعة، و كل لحظة فيها لازم تعيشها صح.